RTI હેઠળ પોલીસને જ ન્યાય ન મળ્યો

Bhaskar News, Rajkot; Tuesday, October 19, 2010

કોટડાસાંગાણીના રાઇટર હેડ રૂ.૨૦ જમા કરવાને બદલે ચાઉં કરી ગયા. કોટડાસાંગાણીના રાઇટર હેડે રૂ.૨૦ જમા કરવાને બદલે ચાઉં કરી ફરજમાં બેદરકારી દાખવી.

કોટડાસાંગાણી પોલીસ મથકમાં ફરજ બજાવતા હેડ કોન્સે. તેજ પોલીસ મથકના રાઇટર હેડ સામે ફરજમા બેદરકારી દાખવી માહિતી અધિકાર હેઠળ જમા કરાવેલી ફી ચાઉં કરી ગયાની ફરિયાદ નોંધાવતા પોલીસબેડામાં ચકચાર જાગી છે.

હાલ જામનગર જિલ્લા પોલીસમા ફરજ બજાવતા ખીમજીભાઇ પેથાભાઇ સરવૈયાએ કોટડાસાંગાણી પોલીસમા રાઇટર હેડ તરીકે ફરજ બજાવતા રમણિકભાઇ હરિભાઇ લખતરિયા સામે નોંધાવેલી ફરિયાદ મુજબ, ગત તા.૪ના રોજ માહિતી અધિકાર હેઠળ રૂ.૨૦ રોકડા ભરી માહિતી મેળવવા ફરજ પરના પી.એસ.ઓ.ને અરજી આપી હતી.પી.એસ.ઓ.એ સ્ટેશન ડાયરીમાં એન્ટ્રી કરી આગળની કાર્યવાહી કરવા રાઇટર હેડ રમણિકભાઇને આપી હતી.

પરંતુ તેમને રાગદ્રેષથી અરજીને રજિસ્ટરે લીધા વગર તેમજ પોલીસ અધિકારીઓને વંચાણે ન મૂકી જમા કરાવેલી રૂ.૨૦ રોકડા ચાંઉ કરી ગયા હતા. જમા કરાવેલા પૈસાની પહોંચ માંગતા રમણિકભાઇ ઉશ્કેરાઇ જઇ તું કાચના ઘરમાં રહે છે ગમે ત્યારે ઝપટમાં આવી જઇશ તેવી ધમકી આપી હતી.

ફરિયાદના અંતમાં ખીમજીભાઇએ કહ્યું છે કે, સાંસદ સભ્ય કુંવરજીભાઇ બાવિળયા સાથે ટેલિફોનમા થયેલી બોલાચાલી બાદ રાઇટર હેડ સહિતનાઓએ અંગત રસ લઇ મારા પર ખોટી ઇન્કવાયરી ઊભી કરી મારી હેડ ક્વાર્ટર,ગોંડલ સીટી અને જામનગર જિલ્લામાં બદલી કરાવી માનસિક રીતે ખતમ કરી દેવાની પણ કાર્યવાહી કરી છે. ફરિયાદ નોંધાવ્યા બાદ હાલ મારા પરિવાર પર જાનનું જોખમ છે.