RTIના નામે તોડબાજી કરતાં લોકોથી કોર્પો.નો સ્ટાફ ત્રસ્ત

Bhaskar News, Ahmedabad

માહિતી છુપાવતા સરકારી તંત્રને નાગરિકો પ્રત્યે જવાબદારીપૂર્ણ બનાવવા માટે કેન્દ્ર સરકારે ઘડેલા માહિતીના અધિકારના કાયદાનો કેટલાક લોકો દુરુપયોગ કરી કમાણી કરતા હોવાની ફરિયાદ ઊઠી છે.

કેન્દ્ર સરકારે કાયદો ઘડયો તેના પગલે સરકારી-અર્ધસરકારી અને મ્યુનિ.ના અધિકારીઓની મુશ્કેલીઓ વધી ગઈ છે. જાતજાતના ખોટા નિર્ણયો અને માહિતી છુપાવવાની પરંપરા આગળ ધપાવતાં અધિકારીઓ માટે આરટીઆઇ ભારે હાલાકી ઊભી કરે છે. આશ્ચર્યની વાત તો એ છે કે કોર્પોરેટરોએ પૂછેલા પ્રશ્નોને લટકાવી દેતાં વહીવટીતંત્રના અધિકારીઓ તે જ સવાલોના આરટીઆઇમાં જવાબ આપવા મજબૂર બને છે. જૉ કે હવે તો અધિકારીઓ ગોળગોળ જવાબો આપવામાં માહેર બની ગયા છે અને તેના પગલે સાચા માનવીને સાચી માહિતી મેળવવા માટે ગાંધીનગરમાં માહિતી કમિશનરની કચેરીના ધક્કા ખાવા પડે છે.

આવા કાયદાની આડ લઈને કેટલાક લોકોએ તો ધીકતી કમાણી શરૂ કરી દીધી છે અને ખાસ કરીને ગેરકાયદે બાંધકામો અંગે માહિતી માગી તોડપાણી કરતા હોવાનું પુરવાર થયું છે, પરંતુ ગેરકાયદે બાંધકામ થયું હોવાથી કોઈ ફરિયાદ કરી શકતું નથી. પરંતુ ગેરકાયદે બાંધકામોમાં જે-તે ઝોનના એસ્ટેટ-ટીડીઓ ખાતાના કર્મચારી, જે-તે વોર્ડના કોર્પોરેટરના હિત સમાયેલા હોવાથી તેમની કમાણીમાં કોઈ ભાગ પડાવે તે સાંખી શકતા નથી. બીજી બાજુ તેમના હાથ નીચે તૈયાર થયેલા કાર્યકરો પોતાનો આગવો ધંધો શરૂ કરી દે છે.

આવા કાર્યકરો કે લુખ્ખાં તત્ત્વોને અટકાવવા માટે સ્ટે. કમિટીમાં રજૂઆત થઈ હતી. તેના જવાબમાં વહીવટીતંત્ર દ્વારા એવો જવાબ આપવામાં આવ્યો હતો કે, આરટીઆઇ કરનારાથી અમે પણ ત્રાસી ગયા છીએ અને કેટલાય અધિકારીઓને દરરોજ ગાંધીનગર અથવા કોર્ટમાં જવું પડે છે.

ગેરકાયદે બાંધકામો રોકશો તો RTIનહીં થાય

ભાજપના કેટલાક કોર્પોરેટરોએ સ્પષ્ટ જણાવ્યું હતું કે, ગેરકાયદે બાંધકામોમાં બિલ્ડર, ટીડીઓ ખાતું અને ભાજપ-કોંગ્રેસના કેટલાય કોર્પોરેટરોને રસ હોય છે તેથી આરટીઆઇ કરનારા ફાવી જાય છે, પરંતુ સમસ્યાનું મૂળ ગેરકાયદે બાંધકામ જ છે તેને થતું રોકવાને બદલે આ બધા આરટીઆઇને જવાબદાર ઠેરવે તે યોગ્ય નથી.

કોઈ નાગરિક પોતાના મકાનમાં મંજૂરી વગર સુધારા વધારા કરાવે તે ગેરકાયદે બાંધકામ ગણાય, પરંતુ તેને ક્ષમ્ય ગણવું જૉઈએ અથવા તો નાગરિકને નજીવી ફી લઇ મંજૂરી આપવામાં આવે તો આ સમસ્યા હળવી બને. જયારે રહેણાક કે કોમર્શિયલ કોમ્પ્લેકસ મંજૂરી વગર બંધાતા હોય તો તેના માટે જે તે વોર્ડના ઇન્સ્પેકટરથી માંડીને ઉરચ અધિકારીને જ જવાબદાર ગણી તેમની સામે સસ્પેન્શન સુધીના કડક પગલાં લેવાં જૉઇએ.