સાંજે ચાર પછી આરટીઆઇની ફી નહીં લેવાય

DB Gold, Vadodara; Thursday, August 19, 2010

સેવાસદનની આરોગ્ય, ખોરાક, રોડ એન્ડ બિલ્ડિંગની કચેરીમાંથી અપાતો જવાબ : કમિશનરને કરાયેલી રજુઆત

કચેરીના કામકાજના સમય દરમિયાન જાહેર માહિતી અધિકાર અધિનિયમ હેઠળ અરજી સ્વીકારવાની હોય છે પરંતુ સેવાસદનનાં કેટલાંક ખાતાંમાં સાંજે ચાર વાગ્યા પછી તેની ફી સાથે અરજી સ્વીકારવાનો સાફ નન્નો ભણી દેવામાં આવી રહ્યો છે.

આરટીઆઇ એક્ટ-૨૦૦૫ હેઠળ નાગરિકોને માહિતી આપવાનો નિયમ વડોદરા સહિત રાજ્યભરમાં અમલમાં મૂકાયો છે. આ નિયમ મુજબ ઓફિસના સમય દરમિયાન અરજદાર પાસેથી વીસ રૂપિયા ફી લઇને આરટીઆઇની અરજી સ્વીકારવાની હોય છે.

પરંતુ, સેવાસદનની આરોગ્ય, ખોરાક અને રોડ એન્ડ બિલ્ડિંગ સહિતની કેટલીક કચેરીઓમાં સાંજે ચાર વાગ્યા પહેલા જ આરટીઆઇની અરજી પેટે વીસ રૂપિયાની ફી સ્વીકારવાનાં પાટિયા પાડી દેવામાં આવી રહ્યા છે.આ કચેરીઓમાં સાંજે ચાર વાગે જતાં અરજદારોને ધરમધક્કા પડી રહ્યા છે.

આરટીઆઇ અંગેની આ બાબતને સમર્થન આપતાં નવજીવન સેવા સમિતિના પ્રમુખ અતુલ ગામેચીએ જણાવ્યું હતું કે, મહાનગર સેવાસદનના કેટલાક વિભાગોમાં સાંજે ચાર વાગ્યા પછી આરટીઆઇની વીસ રૂપિયાની ફી સ્વીકારવાની ના પાડવામાં આવે છે કે જે બિલકુલ કાયદાથી વિરુદ્ધ છે. જેના પગલે, મ્યુ.કમિશનરને પણ લેખિત રજુઆત કરવામાં આવી છે.