આરટીઆઇ એક્ટ હેઠળ માહિતી માંગનારને ધમકી

Bhaskar News, Pardi; Thursday, August 19, 2010

પારડી પાલિકાના ચાર સભ્યોએ અરજદારને ધમકાવી અરજી પરત ખેંચવા જણાવ્યું પારડી પાલિકાના સદસ્ય વિરુદ્ધ એક સ્થાનિકે ચૂંટણીમાં ઉમેદવારે રજૂ કરેલા સોગંદનામાની નકલ રાઇટ ટુ ઇન્ફોર્મેશન એક્ટ હેઠળ માંગી હતી. જેથી પાલિકાના ચાર સદસ્યોએ આ સ્થાનિકને અરજી પરત લેવા જણાવી જાનથી મારી નાંખવાની ધમકી આપી હતી.

પારડી પોલીસ મથકમાં આપેલી લેખિત ફરિયાદ મુજબ કનૈયાલાલ ગણપતભાઇ રોહિતે પારડી તાલુકા પંચાયતમાં પારડી પાલિકાના પાંચ સદસ્યોની ૨૦૦૮ની ચૂંટણીમાં ઉમેદવારે રજૂ કરેલા ઉમેદવારી પત્રક તથા સોગંદનામાની નકલની માહિતી આરટીઆઇ હેઠળ માંગી હતી. સ્થાનિક રહીશ કનૈયાલાલ રોહિત પર બુધવારના રોજ બપોરે પાલિકા સદસ્ય વિનેશ પટેલનો ફોન આવ્યો હતો.

આ ફોન પરથી વોટર વર્કસ સમિતિના ચેરમેન બળદેવભાઇ માંગેલાએ ધમકીભર્યા શબ્દોમાં વાત કરી હતી. બપોરે એક કલાકે પારડી પાલિકા સદસ્ય વિનેશ છીબુ પટેલ, બળદેવ રામદાસ માંગેલા, રાજુ મગન પટેલ તથા ધર્મેન્દ્ર ઉર્ફે ધર્મેશ નટુ પટેલ સ્થાનિક રહીશના ઝેરોક્ષ સેન્ટર પર ધસી જઇ કનૈયાલાલ રોહિતને ગંદી ગંદી મા બહેન સમાન ગાળો આપી તેમજ રાઇટ ટુ ઇન્ફોર્મેશન એક્ટ હેઠળ માંગેલી અરજી પરત ન ખેંચે તો જાનથી મારી નાંખવાની ધમકી આપી હતી.

કનૈયાલાલ રોહિતે પારડી પોલીસ મથકમાં પાલિકાના ચારેય સદસ્યો વિરૂદ્ધ લેખિત ફરિયાદ નોંધાવી હતી. આ બનાવને પગલે પાલિકા વર્તુળમાં સન્નાટો છવાઇ જવા પામ્યો હતો. આ અંગે પીએસઆઇ એન.એમ.પ્રજાપતિએ જણાવ્યું કે, લેખિત ફરિયાદ મળી છે. જેના આધારે તપાસ આરંભી છે. ત્યારબાદ પોલી ફરિયાદ નોંધાશે.