ચેકડેમોની આરટીઆઈ હેઠળ માહિતી આપો

DIVYA BHASKAR; KUTCH

લખપત તેમજ નખત્રાણા તાલુકામાં સરદાર પટેલ સહભાગી જળસંચય યોજના ૮૦/૨૦ના ચેકડેમોના થયેલી ગેરરીતિ બાબતની માહિતી માહિતી અધિકાર હેઠળ માંગવામાં આવતા પોલ પાધરી થઇ જવાની બીકે નિયત સમયમર્યાદા વટાઇ ગઇ હોવા છતાં માહિતી આપવામાં આવી નથી. તેવી ફરિયાદ ગજુભા જાલુભા જાડેજાએ અધિક્ષક ઇજનેરને કરી છે.

રજૂઆતમાં તેમણે જણાવ્યું છે કે ચેકડેમોની ફાઇલો સબડિવિઝન મધ્યે ઇનવર્ડ-આઉટવર્ડ કર્યા વગર બારોબાર મંજૂર થયેલી છે. જૂની ફાઇલો મંજૂર થઇ નથી અને નવી કરાઇ છે. સમગ્રકામની પારદિર્શતા જાણવા બંને તાલુકામાં ચેકડેમો કેટલા મંજૂર કરાયા, વર્ક ઓર્ડર તથા ચૂકવણું સહિતની અન્ય માહિતી માગતા ૩૦ દિવસથી વધુ સમય થયો છતાં અધિકારીઓ એકબીજા પર જવાબદારી ફેંકાફેક કરે છે.

આ બાબતે ત્વરાએ પગલાં ભરવામાં આવે તેવી માગણી કચ્છ સિંચાઇ વર્તુળના અધિક્ષક ઇજનેર સમક્ષ ગજુભા જાડેજાએ કરી છે.