રાજકોટમાં RTIના કાયદાની પણ ઐસીતૈસી:ટાઉન પ્લાનિંગના ભ્રષ્ટાચારનો ભાંડો ન ફૂટે એ માટે તઘલખી નિર્ણયો લેવાયા, બાંધકામ પ્લાનની નકલની ફી રૂ. 200થી વધારી 2000 કરાવી

 Divya Bhaskar: Rajkot: Sunday, 02 June 2024.

રાજકોટમાં સર્જાયેલા અગ્નિકાંડ બાદ RMCના ટીપીઓ મનસુખ સાગઠિયા છેલ્લા ચાર દિવસથી ચર્ચામાં છે. હાલ પોલીસ દ્વારા તેને હિરાસતમાં લઈને તપાસ કરવામાં આવી રહ્યા છે. ત્યારે આ મનસુખ સાગઠિયા છેલ્લા 10 વર્ષથી એક જ પદ ઉપર ફરજ બજાવતા હતા. આ દરમિયાન તેણે અનેક મનઘડત નિર્ણયો પણ કર્યા હતા. જેમા RTI બાંધકામ પ્લાનની નકલ માંગવાનો ચાર્જ સામાન્ય રીતે 100થી 200 રૂપિયા હોય છે તેને 2000 રૂપિયા કરી દેવામાં આવ્યો હતો. એટલું જ નહીં આ માટે તેમણે પદાધિકારીઓને પણ વિશ્વાસમાં લીધા હતા અને સ્ટેન્ડિંગમાં આ ઠરાવ પસાર કરવામાં આવ્યો હતો. જેને લઈને ફરીથી 2000 રૂપિયા વાળો ચાર્જ 200 રૂપિયા કરવામાં આવે તેવી માગ લોકોમાં ઉઠી રહી છે.
કાળા કામો છુપાવવા અવનવા કિમીયા
રાજકોટ મહાનગરપાલિકાનાં ટાઉન પ્લાનિંગ વિભાગના અધિકારીઓ ભ્રષ્ટાચાર કરવામાં લિપ્ત હોવાનું ચર્ચાઈ રહ્યું છે. એટલું જ નહીં પોતાના કાળા કામો છુપાવવા માટે પણ અવનવા કિમીયાઓ અજમાવતા હોવાની વાતો પણ વહેતી થઈ છે. ત્યારે ભ્રષ્ટાચારનો ભાંડો ન ફૂટે તેના માટે સ્ટેન્ડિંગમાં ખાસ ઠરાવ કરવામાં આવ્યો હતો. જેને લઈને કોઈપણ આરટીઆઈ એક્ટિવિસ્ટ બાંધકામ પ્લાનની નકલ માંગે તો તેની ફી રૂપિયા 2000 અને સાદી નકલ હોય તો પ્રતિ કોપી રૂ.100 વસુલવામાં આવે છે.
સાદી નકલ માટે પ્રતિ કોપી રૂ.100 વસુલાય
પ્રાપ્ત વિગત મુજબ રાજકોટ મ્યુનિસિપલ કોર્પોરેશને જાણે માહિતી અધિકાર કાયદાની હત્યા કરી નાંખી હોય અને પોતાનો તમામ ભ્રષ્ટાચાર દબાવી દેવા માંગતી હોય તેવું લાગી રહ્યું છે. સામાન્ય રીતે સરકારનાં નિયમ મુજબ પ્રતિ નકલ બે રૂપિયા અરજદાર પાસેથી લેવાનાં હોય છે, અને બાંધકામ પ્લાનની નકલ જોઈતી હોય તો રૂ.100 કે રૂ.200 જેટલી ફી લેવામાં આવે છે. જોકે કોર્પોરેશનની સ્ટેન્ડિંગ કમિટિએ ઠરાવ કર્યો છે કે, ટી.પી. શાખામાંથી કોઈ અરજદાર કે આર.ટી.આઈ. એક્ટિવિસ્ટ બાંધકામ પ્લાન માગે તો તેણે રૂ. 2000 ચુકવવાનાં રહે છે. સાદી નકલ માટે પ્રતિ કોપી રૂ.100 વસુલવામાં આવે છે.
BPL કાર્ડ ધરાવતાં અરજદારો માટે તોતિંગ ફી સમાન
આ ઠરાવ મહાનગરપાલિકાના બદ ઈરાદાઓની ચાડી ખાય છે. આરટીઆઈ એક્ટિવિસ્ટ અને અન્ય અરજદારો ગેરકાયદે બાંધકામની નકલ માંગે જ નહીં અને અરજી કરે નહીં તે માટે ખાસ કિસ્સામાં આવો નિયમ બનાવાયો છે. સામાન્ય નિયમ મુજબ બી.પી.એલ. કાર્ડ ધારકોને તમામ નકલો નિઃશુલ્ક આપવાની હોય છે. પણ રાજકોટ મનપામાં બી.પી.એલ. કાર્ડ ધરાવતાં અરજદારો માટે પણ આ જ તોતિંગ ફી(2000) ધોરણ નક્કી કરાયું છે. ત્યારે બાંધકામના. ટી.પી. શાખાનાં ભ્રષ્ટાચારને ઢાંકવા માટે વિશેષ જોગવાઈ કરવામાં આવી હોવાનું ચર્ચાઈ રહ્યું છે.
રાજકોટ મહાનગરપાલિકાના કિસ્સામાં ઊલટું પાસુ
ઉલ્લેખનીય છે કે, બાંધકામ પ્લાન તથા અન્ય નકલો જો ટોકન દરથી અપાતી હોય તો તેનો સૌથી મોટો ફાયદો એ છે કે, મનપા અથવા જે-તે વિભાગને ગેરરીતિ, ભ્રષ્ટાચાર વગેરેની માહિતી અરજદારો તરફથી જ મળી જાય છે અને તંત્રની અને અધિકારીઓની મહેનત બચી જાય છે. જોકે રાજકોટ મહાનગરપાલિકાના કિસ્સામાં ઊલટું બન્યું છે. સત્તાધિશો સતત એ પ્રયત્નમાં રહે છે કે, મલાઇદાર સમિતિઓનો ભ્રષ્ટાચાર ઢંકાયેલો જ રહેવો જોઈએ.