નાંદેડમાં RTI કાર્યકર્તાનું ભેદી સંજોગોમાં મોત

મુંબઇ, તા.૨૯

મરાઠવાડામાં જાહેર વિતરણ વ્યવસ્થા (રેશનિંગ), અનાજ અને ફ્યુઅલ વિતરણમાં ભષ્ટ્રાચારને ઉજાગર કરવામાં મહત્ત્વનું યોગદાન આપનાર રાઇટ ટુ ઇન્ફર્મેશન (આરટીઆઇ)ના એક કાર્યકર્તાનો મૃતદેહ આજે નાંદેડમાં મળી આવતાં ભારે ચકચાર મચી જવા પામી છે. અચાનક આવા ભેદી સંજોગોમાં થયેલાં મોત પાછળ તેમની હત્યાની આશંકા નિવારી શકાતી નથી. આ મોતથી ભ્રષ્ટાચારને ઉઘાડો પાડવામાં બલિદાન આપનારાઓની યાદીમાં તેમનો પણ સમાવેશ થયો છે. શિવસેનાએ આ મામલામાં સીબીઆઇ તપાસની માંગ કરી છે.

૪૩ વર્ષના યુવા વયના રામદાસ ઘાડેગાવકર શિવસેનાના સ્થાનિક નેતા પણ હતા. આરટીઆઇ મારફત એ વિસ્તારમાં વ્યાપક પ્રમાણમાં ભ્રષ્ટાચારને ઉજાગર કરવામાં તેઓ આગળ પડતું નામ ધરાવતાં હતાં.

સીબીઆઇ તપાસની માંગ

જોકે પોલીસે આવા અચાનક મોતનો એક મામલો નોંધી લીધો છે. મોંઘા વિસ્તારમાંથી મોડીરાત્રે તેમની લાશ મળી આવી હતી. પોસ્ટમોર્ટમના પ્રાથમિક અહેવાલમાં રામદાસના શરીરમાં વધુ પડતું આલ્કોહોલ હોવાનું જણાયું હતું. તેમના ભાઇએ પોલીસને માહિતી આપી હતી કે શુક્રવારે સવારે આઠ કલાકે રામદાસ ઘરેથી નીકળ્યા હતા.

તાજેતરમાં ગુજરાતમાં એક આરટીઆઇ કાર્યકર્તા અમિત જેઠવાના મોતના મામલે ધરપકડોનો દોર ચાલી રહ્યો છે ત્યાં જ દેશમાં વધુ એક એવી વ્યક્તિના આવા ભેદી સંજોગોમાં મોતથી ખળભળાટ મચી જવા પામ્યો છે. જેઠવાએ ગીરના જંગલ વિસ્તારમાં ગેરકાયદેસર ખાણકામ કરનારાઓની પોલ ખુલ્લી પાડી હતી.

રામદાસ આરટીઆઇ એક્ટનો ઉપયોગ કરીને પીડીએસ, અનાજ અને ફ્યુઅલના વિતરણમાં ચાલતા ભષ્ટ્રાચારને ઉજાગર કરવામાં સક્રિય હતા. તેઓ ડિસ્ટ્રિક્ટ મિલ્સ સેલર્સ એસોસિયેશનના પ્રમુખ પણ હતા. શિવસેનાના જિલ્લા પ્રમુખે સિનિયર પોલીસ અધિકારીઓની મુલાકાત લઇ આ ભેદી મોતમાં સીબીઆઇની તપાસની માંગ કરી હતી.