સ્ટાફ ૫૦ ટકા ઘટી જતાં RTI હેઠળ અરજીઓનો ભરાવો

DIVYA BHASKAR: AHMEDABAD

સ્ટાફની અછત અને ઓફિસની દયનીય હાલતને કારણે એક સરકારી અધિકારીએ કેન્દ્રીય માહિતી કમિશન(સીઆઈસી) સમક્ષ તેમની હૈયાવરાળ ઠાલવીને કહ્યું હતું કે આવી સ્થિતિમાં વધુ પડતા કામના દબાણને કારણે માહિતી અધિકાર ધારા મુજબ અરજદારને માહિતી પૂરી પાડવામાં વિલંબ થઈ રહ્યો છે.

આરટીઆઈ હેઠળની અરજી રજિસ્ટ્રાર ઓફ કો-ઓપરેટિવ સોસાયટીઝ(આરસીએસ) સમક્ષ આવે છે, જે આરટીઆઈ હેઠળ અરજી કરનારા જી.સી. ભાટિયાને સમયસર માહિતી આપી શક્યું ન હતું. આથી તેમણે સીઆઈસી સમક્ષ અપીલ કરી હતી. આસિસ્ટન્ટ રજિસ્ટ્રાર વેદપ્રકાશે સીઆઈસીને કહ્યું હતું કે તેઓ કામને પહોંચી વળી શકે તેમ નથી, કારણ કે આ ઝોનમાં ૫૦ ટકાથી ઓછો સ્ટાફ છે.

ગત ડિસેમ્બરથી અડધાથી ઓછો સ્ટાફ થઈ ગયો છે તેને કારણે તેઓ રજા પણ લઈ શકયા નથી. માહિતી કમિશનર શૈલેશ ગાંધીએ તેમના આદેશમાં નોંઘ્યું હતું કે ‘તે(વેદપ્રકાશ)નું કહેવું છે કે એક સમયે ત્રણ આસિસ્ટન્ટ રજિસ્ટ્રાર હતા અને ઝોનમાં ૧૬નો સ્ટાફ હતો. ડિસેમ્બર-૨૦૦૯થી તેઓ એકમાત્ર આસિસ્ટન્ટ રજિસ્ટ્રાર છે અને આઠ જ વ્યકિતનો સ્ટાફ છે.’

વેદપ્રકાશે તેમની અપીલમાં કહ્યું હતું કે ‘ઓફિસની સ્થિતિ પણ ખૂબ જ દયનીય છે. રેકોડ્ર્સ આડેધડ પડેલા છે અને ફાઈલો ગોઠવવી પણ મુશ્કેલ છે, કારણ કે કેટલીક ફાઈલો ગુમ થઈ ગઈ છે. ફાઈલ રાખવા માટે યોગ્ય જગ્યા પણ નથી અને તેને કારણે નીચે જ મૂકવી પડે છે. સિનિયરોને આ સમસ્યા કહેવાનો કોઈ મતલબ નથી કારણ કે તેઓ બધું જાણે જ છે પરંતુ તેઓ પણ તેમાં કંઈ કરી શકે તેમ નથી.’ સીઆઈસીએ વેદપ્રકાશની આ ફરિયાદ પર ઘ્યાન આપવા અને તેનો ઉકેલ લાવવાનો આદેશ કર્યોછે.